زعمة يعملوها..؟

هاو ڨالك باش ينحو معروف ولعل يرجعوا المنكبي ولعل يزيدو يعتذروا ليه خلاص..
هاو كي مشى الطبوبي أثث الديكور متاع نادية عكاشة الي عملاتو في القصر باش ترد بيه على شورى النهضة، هاو صبحت أطراف اخرى مشبوهة هي الي تعطل في الإنتاج وخاصة الفوسفاط وطلعت طلائع البطحاء صبونها نظيف!


هاو الطبوبي روح منّا وهوما بدو يسربوا منا “الاتحاد حصن عريق ولابد من دعم استقرارو” فاهمين استقرارو شنو معناها؟! معناها وقفت معايا في عرسي، غيّر قانونك الداخلي تو نوقف معاك في عرسك.
هاو طلع الشق الثاني متاع قلب تونس الي نشق على نبيل، طلع انشق على خاطر هو نظيف ويرفض الفساد، وڨالك التحق بقلب باش يصلح ، حاول حاول حاول ما ڨدش ولى رمى المنديل..كلّو الا الفساد..هذاك علاش التنسيق معاه على قدم وساق..


هاي طلعت عبير عادي كي تكون تجمعية وقالك ممكن تدعم بقاء الحكومة ونحن نتعامل مع أحكام القضاء والقانون والدستور ما يهمناش في اللافتات..
هانا دخلنا بلافتة محاربة الفساد رصت لينا ندمروا في العملية الديمقراطية ونلعبوا بالنتائج ونسنوا في سنن خبيثة ما سنهاش حتى محسن مرزوق كي كان يحكم مع السبسي!


هاو ڨال راني جاي نحارب في الفساد..جاي ندعم في التنمية…جاي ندافع على المهمشين.. جاي نواصل في الانتقال.. جاي نحمي في الثورة……… طلع البارح قال انا جاي نخرج في النهضة من السلطة!!!!!!!
باهي خرجها بالصناديق!
الصناديق جربناها ما نفعتش
سيدي خويا راو انقلاب هذا؟!
لا حاشا وكلاّ كلو بما يرضي الله والدستور والوطن…..
تو اما احسن كي تخسر في الانتخابات تكون راجل وترجع للشارع
والا تكون خليقة وتمشي تعربد في الشارع؟!

نصرالدين السويلمي

Share Button
Total 1 Votes
0

Tell us how can we improve this post?

+ = Verify Human or Spambot ?

حول الكاتب

JOURNAL